कसे वाटते सांग मला छळताना ?
मला जाळुनी पुन्हा स्वत: जळताना !
मजा वाटते आणि रागही येतो
शर्यत संपून गेल्यावर पळताना !
तुला पुरावे मिळतील मी असण्याचे
मी नसताना अश्रू ओघळताना !
तुझियावरती पाऊस कोसळताना
आज पाहिले पाणी विरघळताना
एकही नव्हता सोबत गर्दीमधला
वळणापाशी शेवटच्या वळताना !
उल्लू नव्हतो ! स्वत:स रमवत होतो
आस्तिक होऊन मस्तक आदळताना !
नव्या नव्या मज ओव्या सुचती रोज
जुनेच जगणे पुन्हा पुन्हा दळताना !
बघत राहिले जग पेल्यातुन माझ्या
वाफ मामुली विराट वादळताना !
-संदीप खरे
No comments:
Post a Comment